“Ёсцъ паэты, якія пішуць творы, каб потым з ix выдаць выбранае, але ёсць i паэты, што пішуць толькі выбранае. Да такіх i належыць Максім Багдановіч”.
Максім Танк
Максіма Багдановіча называюць песняром красы і гармоніі. Вялікая любоў жыве ў народзе да яго паэзіі, да яго самога – як чалавека таленавітага і самаадданага. Кожнае пакаленне зноў і зноў адкрывае для сябе веліч асобы паэта і незвычайнае хараство яго лірыкі. Максім Багдановіч – гонар і слава беларускай літаратуры, адзін з самых знакамітых і любімых паэтаў. Яго вершы даўно перакладзены на дзесяткі моў, пранізліва і тонка гучаць і ў нашы дні. “І тчэ, забыўшыся, рука заміж персідскага ўзору цвяток радзімы васілька…” – знакамітыя радкі, якія сталі класікай і знаёмыя амаль кожнаму.
Вядомаму паэту, перакладчыку, публіцысту Максіму Багдановічу 9 снежня споўнілася 130 гадоў з дня нараджэння.
Бібліятэкі раёна падрыхтавалі выставы, прысвечаныя юбілею беларускага класіка, мультымедыйныя прэзентацыі, дзе дэманстраваліся фотаздымкі дзіцячых і юнацкіх гадоў М. Багдановіча. На тэматычных выставах прадстаўлены зборнікі «Выбраныя творы», «Вянок», паэтычны зборнік “Пярсцёнак”, у які ўвайшлі творы з нявыдадзенных зборніка «Шыпшына», таксама творы аб жыцці і дзейнасці паэта, выставы дапаўнялі старонкі водгукі аб творчасці, фотадакументы і нават ноты песень на вершы Максіма Багдановіча.
Шэрагам мерапрыемстваў адзначылі юбілей паэта бібліятэкі раёна. Напрыклад, бібліятэкар Стайкаўскай сельскай бібліятэкі для сваіх чытачоў арганізавала літаратурную панараму “Яго творы з глыбінь душы”. На мерапрыемстве Кірыл Пятрэнка выдатна дыкламаваў вершы Максіма Багдановіча, а пасля ўсе прысутнічыя разам узгадвалі падзеіі з біяграфіі знакамітага класіка беларускай літаратуры.
Удзельнікі юбілейных вечарын, літаратурных гадзін знаёміліся з жыццём і творчасцю класіка беларускай літаратуры, слухалі яго паэтычныя творы, вершы, пакладзеныя на музыку ў выкананні ансамбля «Песняры», адказвалі на пытанні віктарын па творчасці паэта і шмат іншага.
У Кіраўскай цэнтральная бібліятэцы запланаваны паэтычны салон “Геній зямлі беларускай”, у Паўлавіцкай сельскай бібліятэцы – літаратурная гасцёўня “Жамчужына нашай спадчыны” і паэтычны вечар “Я не выпадковы госць зямлі роднай” у Дабаснянскай сельскай бібліятэцы.
Алена Нікалаенка, загадчык аддзела бібліятэчнага маркетынгу
